..అంబటి వారి ‘మేకపోతు గాంభీర్యం’.. కేసులు పెరుగుతున్నా తగ్గని నోటి దూకుడు..!
..వరుస కేసులు.. అయినా మారని అంబటి రాంబాబు తీరు
..కేసులపై గగ్గోలు.. రాజకీయ వ్యాఖ్యల్లో మాత్రం అదే దూకుడు
..68 ఏళ్ల వయసులోనూ రాజకీయ హుందాతనాన్ని పక్కనపెట్టి వివాదాస్పద వ్యాఖ్యలేనా?
..అంబటి రాజకీయ భాషపై సొంత పార్టీలోనూ చర్చ జరుగుతోందా?

మహానాడు, అమరావతి: రాజకీయాల్లో విమర్శలు సహజమే., కానీ విమర్శలకు కూడా ఒక హద్దు, హుందాతనం ఉంటుందని రాజకీయ విశ్లేషకులు చెబుతుంటారు.. అయితే వైసీపీ నేత అంబటి రాంబాబు విషయంలో మాత్రం ఈ సూత్రం వర్తించడం లేదన్న విమర్శలు వినిపిస్తున్నాయి. తనపై వరుసగా కేసులు నమోదవుతున్నా.. వాటిపై వివరణ ఇచ్చుకోవడం కంటే రాజకీయ ప్రత్యర్థులపై విమర్శలు చేయడానికే ఆయన ఎక్కువ ప్రాధాన్యం ఇస్తున్నారన్న చర్చ జరుగుతోంది.

తాజాగా తన యూట్యూబ్‌ ఛానల్‌లో పోస్టు చేసిన పాటకు సంబంధించి కేసు నమోదు కావడంతో అంబటి వ్యవహారం మరోసారి రాజకీయ చర్చలోకి వచ్చింది.

కేసు నమోదైనా.. ‘కౌంటర్‌’ అంటూ సమర్థించుకోవడం

సీఎం చంద్రబాబు నాయుడు, కూటమి నేతలను ఉద్దేశించి అభ్యంతరకరంగా ఉన్నట్లు ఆరోపణలు వచ్చిన పాటను తన యూట్యూబ్‌ ఛానల్‌లో పోస్టు చేయడంపై టీడీపీ నేతలు పోలీసులకు ఫిర్యాదు చేశారు.. దీంతో గుంటూరు పట్టాభిపురం పోలీసులు కేసు నమోదు చేశారు.

అయితే అంబటి మాత్రం దీనిని రాజకీయ కక్షగా చూడొద్దని.. వైసీపీపై వస్తున్న విమర్శలకు కౌంటర్‌గా ఆ పాటను పోస్టు చేసినట్లు వివరణ ఇచ్చారు.

ఇక్కడే అసలు ప్రశ్న మొదలవుతోంది.. రాజకీయ ప్రత్యర్థిని విమర్శించేందుకు ఏ భాషనైనా, ఏ రూపాన్నైనా ఉపయోగించడం సమర్థనీయమేనా? అని రాజకీయ వర్గాల్లో చర్చ జరుగుతోంది.

‘ఎఫ్‌ఐఆర్‌ మాత్రమే’ అంటూ ఎదురుదాడి

తనపై నమోదైన కేసులన్నీ ఎఫ్‌ఐఆర్‌ దశలోనే ఉన్నాయని, చార్జ్‌షీట్లు దాఖలు కాలేదని అంబటి చెబుతున్నారు.. చట్టపరంగా ఇది ఆయన వాదన కావొచ్చు కానీ అదే సమయంలో కేసులు ఎందుకు నమోదవుతున్నాయి? వరుసగా వివాదాలు ఎందుకు వస్తున్నాయి? అన్న ప్రశ్నలకు కూడా సమాధానం చెప్పాల్సిన అవసరం ఉందన్న అభిప్రాయాలు వ్యక్తమవుతున్నాయి.

అరెస్ట్‌.. రిమాండ్‌.. అయినా మారని తీరు?

చంద్రబాబు నాయుడిపై అనుచిత వ్యాఖ్యలు, పోలీసుల విధులకు ఆటంకం కలిగించారనే ఆరోపణలపై గత ఫిబ్రవరిలో అంబటి అరెస్ట్ అయ్యారు.. అనంతరం కోర్టు పరిణామాలతో కొంతకాలం రిమాండ్‌లో ఉన్నారు.

అయితే ఆ పరిణామాల తర్వాతైనా తన రాజకీయ భాషను మార్చుకుంటారని భావించిన వారికి.. అంబటి వ్యాఖ్యలు మరోలా కనిపిస్తున్నాయన్న విమర్శలు వస్తున్నాయి.

కేసులు వస్తున్నా.. అరెస్టు జరిగినా.. రాజకీయ ప్రత్యర్థులపై మాటల దాడి మాత్రం ఆగడం లేదన్నది ఆయనపై వస్తున్న ప్రధాన విమర్శ.

పెమ్మసాని వ్యవహారంలోనూ వివాదం

కేంద్రమంత్రి పెమ్మసాని చంద్రశేఖర్‌ను కించపరిచేలా సోషల్‌ మీడియాలో వీడియో పోస్టు చేశారనే ఆరోపణలపైనా అంబటిపై కేసులు నమోదయ్యాయి.

ఈ వ్యవహారానికి సంబంధించి సీఐడీతో పాటు గుంటూరు అరండల్‌పేట పోలీస్‌ స్టేషన్‌లోనూ కేసులు నమోదైనట్లు సమాచారం.

ఇలాంటి వరుస వివాదాలు ఒక మాజీ మంత్రికి రాజకీయంగా ఎంతవరకు ఉపయోగపడతాయన్నది ఇప్పుడు చర్చనీయాంశంగా మారింది.

‘లక్కీ డిప్‌’ వ్యవహారం కూడా

2023లో సత్తెనపల్లిలో సంక్రాంతి సందర్భంగా నిర్వహించిన లక్కీ డిప్‌ వ్యవహారం కూడా అంబటి రాంబాబు చుట్టూ వివాదాన్ని తీసుకొచ్చింది. ఈ కేసులో డిజిటల్‌ ఆధారాల అంశం తెరపైకి వచ్చింది.

ఈ వ్యవహారంలో కోర్టు పరిణామాలు చోటుచేసుకున్నాయి.

అయితే ఇన్ని వివాదాలు ఎదురైన తర్వాత కూడా అంబటి తన రాజకీయ శైలిని మార్చుకోకపోవడం ఆయన విమర్శకులకు మరో అస్త్రంగా మారింది.

68 ఏళ్లు.. అయినా అదే రాజకీయ శైలి!

నాలుగు దశాబ్దాల రాజకీయ అనుభవం ఉన్న నాయకుడిగా అంబటి రాంబాబుకు రాజకీయ వ్యవస్థపై అవగాహన ఉంది. రెండుసార్లు ఎమ్మెల్యేగా, మంత్రిగా కూడా పనిచేశారు.

అలాంటి అనుభవజ్ఞుడైన నాయకుడి నుంచి మరింత హుందాతనంతో కూడిన రాజకీయ భాషను ప్రజలు ఆశించడం సహజమే. కానీ తరచూ వివాదాస్పద వ్యాఖ్యలు, కేసులు, రాజకీయ ప్రత్యర్థులపై వ్యక్తిగత విమర్శలు ఆయన చుట్టూ వివాదాలను కొనసాగిస్తున్నాయని విమర్శకులు అంటున్నారు.

ప్రభుత్వాన్ని ప్రశ్నించడం ప్రతిపక్ష నేతల బాధ్యతే. తప్పులను ఎత్తిచూపడం కూడా ప్రజాస్వామ్యంలో అవసరమే. కానీ విమర్శలకు బదులుగా వ్యక్తిగత దూషణలు, వివాదాస్పద కంటెంట్‌ చుట్టూ రాజకీయాలు తిరిగితే.. అసలు ప్రజా సమస్యలు పక్కకు వెళ్లే ప్రమాదం ఉంది.

ప్రజా సమస్యలపై పోరాడే ప్రతిపక్ష నేతగా కనిపించాల్సిన సమయంలో.. కేసులు, వివాదాలు, మాటల యుద్ధాలతోనే ఎక్కువగా వార్తల్లో ఉండటం ఆయన రాజకీయ భవిష్యత్తుకు ఎంతవరకు ఉపయోగపడుతుంది?

అంబటి రాంబాబు రాజకీయంగా ఎంత దూకుడుగా మాట్లాడినా.. ప్రజా జీవితంలో హోదా, అనుభవం పెరిగే కొద్దీ బాధ్యత కూడా పెరుగుతుంది. కేసులు నమోదవుతున్నప్పుడు చట్టపరంగా తన వాదనను వినిపించడం ఒక విషయం.. అదే సమయంలో తన రాజకీయ భాషపై ఆత్మపరిశీలన చేసుకోవడం మరో విషయం.

వరుస వివాదాలు, కేసుల మధ్య కూడా అదే నోటి దూకుడు కొనసాగిస్తారా? లేక రాజకీయ విమర్శలకు కొత్త హద్దులు నిర్ణయించుకుంటారా? అనేది అంబటి రాజకీయ భవిష్యత్తు ప్రయాణంలో కీలకంగా మారనుంది.